16Ang napulog-usa ka tinun-an miadto sa Galilea, didto sa bungtod nga paadtoan kanila ni Jesus. 17Ug sa ilang pagkakita kaniya, gisimba nila siya, bisan tuod may pipila kanila nga nagduhaduha. 18Miduol si Jesus ug miingon kanila, “Gihatag kanako ang tanang gahom sa langit ug sa yuta. 19Busa panlakaw kamo ngadto sa tanang katawhan sa tibuok kalibotan ug himoa sila nga akong mga tinun­an, ug bunyagi sila sa ngalan sa Amahan, sa Anak ug sa Espiritu Santo, 20ug tudloi sila pagtuman sa tanan nga akong gisugo kaninyo. Ug hinumdumi! Ako mag-uban kaninyo sa kanunay hangtod sa kataposan sa kalibotan.” Ang Ebanghelyo sa Ginoo.

oOo

KAHULOGAN SA EBANGHELYO (Mateo 28:16-20)

16aAng napulog-usa ka tinun-an miadto sa Galilea...

Kining maong bersekulo nagtug-an kanato kon “kinsa ang Simbahan”. Kini mao ang “Simbahan sa mga Kanasuran” — dili lamang sa mga Judio. Ang mga tinun-an gidapit mismo ni Jesus sa pagbiya sa Jerusalem (Mt 28:7), nga niadtong panahona mao ang dapit nga maoy sentro sa mga buluhaton sa Pagtuo, ang dapit sa Presensya sa Dios.

Sumala ni San Mateo, walay gihimong “opisyal” nga pagpakita (apparition) ni Jesus ngadto sa iyang mga Apostoles didto sa Jerusalem. Kadtong pagpakita ni Jesus sa mga kababayenhan giisip nga usa ka “pribado” nga pagpakita. Sa ato pa, diha sa ilang pagtapok ni Jesus didto sa Galilea, ang Simbahan nagsugod “sa Galilea”, ang gitawag og “Galilea sa mga Kanasuran”. Mao kini ang kinaiya sa Simbahan: bukas alang sa tanan. 16b …didto sa bungtod nga paadtoan kanila ni Jesus. Ang pinulongang Griego alang sa “Simbahan” mao ang “Ekklesia”, nga sa ato pa “ang panagtapok sa mga katawhan nga gitawag”. Ang mga Kristyanos mao kadtong mga gitawag sa nabanhawng Jesus.

Ang “bukid” mao ang dapit diin ang Dios mopadayag sa iyang kaugalingon. Didto sa “bukid” nga si Jesus mihimo sa iyang unang wali (Mt 5:1-8), mihimo sa iyang pag-ampo (Mt 14:23), mihimo sa iyang pagpipilo sa pan (Mt. 15:29), ug mihimo sa kausaban sa iyang panagway (Mt. 17:1-9). Ang “bukid” mao ang simbolo sa Simbahan. 17aUg sa ilang pagkakita kaniya, gisimba nila siya...

Kining maong pagsimba gihulagway nga mao ang “paghapa”. Sa Ebanghelyo sumula ni San Mateo kini mao ang gihimo sa mga Apostoles human hununga ang makusog nga unos ni Jesus samtang nagluwan sila sa sakayan (Mt. 14:33), mao ang gihimo sa tulo ka mga makinaadmanon didto sa Belen (Mt. 2:11), sa sanglahon (Mt 8:2), ug sa babaye nga taga Canaan (Mt. 15:25). 17b...bisan tuod may pipila kanila nga nagduhaduha.

Ang mismong Simbahan nga nagsimba kang Jesus, nagapabilin nga gilangkoban sa mga makasasala. Mao usab sa atong pagtuo karon, ang pagtuo sa mga Apostoles gisagolan sa pagduhaduha. Nahitabo kini tungod kay ang atong pagtuo usa man ka pagtuo nga anaa pa sa “paglawig”. Ang Simbahan nga miabiabi kang Jesus mao usab ang usa ka Simbahan nga anaa “ang mga katawhan nga kulang sa pagtuo” (Mt. 14:31).

18Miduol si Jesus ug miingon kanila, “Gihatag kanako ang tanang gahom sa langit ug sa yuta. 19Busa panlakaw kamo ngadto sa tanang katawhan sa tibuok kali­botan… 20ug tudloi sila pagtuman sa tanan nga akong gisugo kaninyo. Ug hinumdumi! Ako mag-uban kaninyo sa kanunay hangtod sa kataposan sa kalibotan.” Pagkaharianon gayod niining maong pahayag ni Cristo. Human sa iyang tinagong pagpuyo isip usa ka kabus ug yanong panday sa Nasaret, ania daw mibutho ang kamatuoran, kamatuoran nga nagpaila sa mga katawhan kon kinsa gayod kini si Jesus.

Sa iyang paglitok sa makaupat nga higayon sa pulong “tanan” : gahom, katawhan, kasugoan, ug panahon nagtug-an kanato sa kahingpitan nga anaa kang Jesus. Ingon niini: 1) Anaa kaniya ang kahingpitan sa Aksyon sa Dios pinaagi sa iyang nahuptan nga gahom; 2) anaa kaniya ang kahingpitan sa tawo sa dihang pinaagi kaniya ang Dios nagpakatawo uban kanato; 3) anaa ang hingpit nga kabag-ohan sa tawo pinaagi sa pagsugot sa iyang mga kasugoan; ug 4) anaa ang kahingpitan sa panahon diin kining tanan mahitabo ug matuman!

19b...ug himoa sila nga akong mga tinun­an, ug bunyagi sila sa ngalan sa Amahan, sa Anak ug sa Espiritu Santo, Dinhi gipadayag ang misyon o katuyoan sa Simbahan nga mao gayod “ang panagtapok sa tanang mga katawhan uban sa gugma”. Ang maong panagtapok o panagtigom nagasukad sa gugma sa Dios nga mimando sa mga Apostoles sa “pagbunyag”, nga sa ato pa “paglubong sa kaugalingon” nga maoy gipasabot sa pulong nga Griego nga “baptizo”. “Baptizo” mao ang kadugtungan sa Amahan, Anak, ug Espiritu Santo. Kadugtungan usab kini sa tanan nga mituo ug nagpabunyag diha kang Kristo.

20ug tudloi sila pagtuman sa tanan nga akong gisugo kaninyo. Ug hinumdumi! Ako mag-uban kaninyo sa kanunay hangtod sa kataposan sa kalibotan.” Ang sukaranan sa pagtuman sa tanang sugo walay lain kondili ang gugma. Kon kita maghigugmaay sa usag-usa anaa usab ang kasinatian sa nagapadayong paghigugma sa Dios sa matag usa kanato!